Alla Tacajab Weynaa!

 Ma waalni mana fayoobi! Taarig maahi mana tukado! Ma astajoodo Masaajidkana macmiil ayaan ka ahay! Quraanka dushaan ka aqaan Ilaaheyna aad u garan maayo! Ma yaxyaxo mana xishood yari! Been ma sheego mana run badni! Waan qosol badanahay qamuunyana iguma yara!

Waan ku arkaa in aad igu wareersan tahay. Maxaanse kuu qaban karaa aniga laftayda ayaa isku wareersan walaacna ima haayee! Been kuu sheegi maayee, war haddaan doonana waan kuu sheegayaaye, aad baan u faraxsanahay tiiraanyana waan la liitaa! Sabool maahi silacna waan ku noolahay! Sacabbada ayaa kor iigu taagan saaddambana ballan sino ayaan leeyahay!

Haddaad ila yaabban tahay horayba la iila yaab. Nin ila yaabay, mar aan islahaa ha yaab gooyo ayaan hadda ka hor sidaan iri. Inaan kas u iri iyo in hadalku iga soo fakaday shaki aan badnayn ayaa iiga jira. Kolleyba erayadu afkayga waa ay ka soo baxeen. Mise tolow waa laga soo saaray? Si ay tahayba sidu sidaan ayay ahayd:

"Ninka daad la tago beri

Bal inay wax uun tari

Xumbaduu tol moodaa"

Maskaxdey ka timideey

Been maxaad ku tacaddiday

Runna taagtay calankeed!

Taa waxaa ka sii daran

"Tus ninkuu haleelee

Ku dayooba tiixii,

Tooruhuu ku dhaco buu

Tubta toosan moodaa"

Xirsigii tilmaan gabay

Tix ku yiri oraahdaa.

 

"Filgin toban jir kugu muda

Adigoo tukubayuu

Taah kugu abuuraa

Kuna turunturreeyaa"

Taana waan dhankaygoo

Tuug ma xado, ma taabtee,

Qalinlaha tixanihiyo

Sooyaalka teboyoow

Taariikhda ii geli.

 

Waa tilmaan ujeed lehe

Xabbadkaan ka tuuriyo

Toddobaatankii shilin

Tiinkaan ku beertaa

Weli igu taqraarane

Tuutihii ibliiskoow

Murugtaad tallaashiyo

Tiiraanyadaadii

Tawstaan ka qaadaan

Waagadaan tacbaan ahay!

 

Tu kalaan hilmaamaye

Xudduudaha tallawgiyo

Tafantoofka gaajada

Iyo kala taggeygiyo

Tiihaan ku nooliyo

Tub-wareerka igu dhacay

Tafiirtaadi weeyee

Tuutihii Ibliiskoow

Tiirkii xumaantiyo

Taalladii nijaasada

Maxaan belo ka taransaday!

 

Alla tacajab weynaa!

 

Waxaan ahay nin boqol tegay

Oo Cirradu tunkiisiyo

Teekallada ka gudubtoon

Misna tiisu meel marin!

Totan toban la garab dhigay

Ninka taagan maantoo

Til-tillaabsanaayaa

Igu dhaama taladiyo

Tus-tusmeynta xaajada!

 

Alla tacajab weynaa!

 

Waxaan ahay nin tooraha

Lugu tago cadaabaha

Tillaabada ka dhowrtee,

Tagoogaha khinsiirkiyo

Turuqyadiyo feeraha

Taaban maayo baan iri

Fuudkii ka tiixana

Intaan midigta taagtaan

Tartiib fiiqsanaayaa!

 

Alla tacajab weynaa!

 

Waxaan ahay nin toobada

Toddobaatan laaboo

Inay dunidu beri tahay

Tafsiirrada ku qaatoo

Kutubbada tacliintiyo

Tuxfahaan aqaannaa;

Faral tiirdhaxaad iyo

Lama taabto weeyee

Sunno igama tegin weli

Misna taarig baan ahay!

 

Alla tacajab weynaa!

 

Waxaan ahay tubaakada

Nin takoora kii cuna

Mid tufaayga jecel baan

Intaan reeme tobolsado

Misna sacab u tumayaa!

 

Alla tacajab weynaa!

 

Waxaan ahay nin turuqiyo

Xooggiisu taam yahay

Tanqal laga baqaan ahay

Tabcadaan ku caan ahay

Tifse waan ka litaa

Taag yaraan daraaddeed!

 

Alla tacajab weynaa!

 

Nin tadha'ay ayaan ahay

Tol baan kibir wadaagnaa

In la tororgleeyiyo

Talo wey gudboon tahay

Rabbi tiisa mooyee

Tabar aadmi kama baqo

Ninkaan faraha ula tago

Qonoftaan ku taagaa

Tagooguhu jejebayaan

Haddii ruux i taabtana

Ilmaa iga tifleydoo

Taw-tawaawacaygaa

Shumbiruhu ku toosaan!

 

Alla tacajab weynaa!

 

Taqi taqi dhalaan ahay

Maftaxayga kama tago

Markii diiqu taahaan

Ubbadayda taabtaa

Tilmaantii Rasuulkiyo

Tubtii Eebbe jeexana

Saantaydu kuma taal!

 

Alla tacajab weynaa!

 

Cadcaddii timaadaba

Farxad baan ku toosaa

Taxtaxleynta hadalkiyo

Tan-tannaagadaydaa

U tillaaba daafaha

Misna taws xanuun iyo

Tiiraanyo wey wehel!

 

Alla tacajab weynaa!

Taag-taagga farihiyo

Toos-toosku badanaa!

Rabbi tiisa weeyee

Tuulo shaamarreer iyo

Amakaag ka taliyaa

Anigoon ku talaggelin

Tooruhu na geeyaye

Xaajadu tigtiganaa

Taf halkay ku leediyo

Tuurteedu dheeraa!

 

Carrabkayga tixihiyo

Maansada tir-tiriyaa

Jiqda nala taraaraye,

Isdiiddadan tamuuxa ah

Haddii aan tiriig jirin

Waa lugu tasoobiye

Toosh bilig ma siiyaa?

 

Sadarrada tashiilkaa

Macnohooda taamkaa

Toos looma helayee

Tafaasiil ma bixiyaa?

 

Waa tabtaad fileysaye,

Nin nasiibku taakiyo

Toban meyl u jiro oo

Waayuhu tareesiyo

Xabbad kula tu'deenoo

Toogteen ayaan ahay;

Haddaan sacabka taagana

Su'aaluhu tixgelin ma leh!

 

Halka loo tukado oo

Loo tebiyo faralkiyo

Tii Eebbe ina faray

Markaan tiigso maagaba

Koofur baan tammadiyaa!

Kolkaan Bari ku talaggalo

Cagsi baa tillaabadu

Toobiyaha u qaaddaa!

 

Hadal tiro wax kuma lehe

Halkaan maanta taagnahay

Tallankiyo wareerkiyo

Walaahow-tasowgiyo

Toore-seegga igu dhacay

Waxaa kuu tusaale ah,

Nin tareen cadaabeed

Tigidkii u goostaan

Tubihii fardowsaad

Tilmaantood ka sugayaa

Alla tacajab weynaa!!!!!!!!!!

 

Haddaba waxaan ahay ninkaan ahay; nin aanan ahaynna noqon maayo, horayna uma noqon, haddana ma ahi, mana noqon doono, inaan noqdana ma rabo, haddii noqo lay dhahana waa laygu noogayaa! Haddii aad weli yaabban tahay, aniguna kula mid ayaan ahaye Rabbi ma isla barinnaa? Jawaab lala soo daaho ma jecliye nugu kala wad oo meeshii aad Ilaahey u taqaan aad!

 

 

W/Q Abwaan Seefdheere