Ninkii Heestu Quraac La'aanta Dhigtay!

-

 

Heestaan Nimcaan Hillaac qaado, markii uu hadda maqlaba lugtuu ku raftaa qiso qosol badan oo uu xilli hore kala kulmay awgeed.Dhammaadkii 2013kii iyo billaawgii 2014kii mid ay ahayd ma uu sixi karo. Waa goor mid yar oo xuuralcayntii adduunka ahayd ay ka daldoorsatay.

Subax subaxyada ka mid ah iyadoo heestaani u daaran tahay ayaa waqtigii quraacda la gaaray. Aayadiis, ilmaha la dhashay hooyadood, ayaa u yeertay oo ku tiri "Ibraahinoow qof kaa fudud ma joogtee kaalay eeddo quraacda qaado." Qolkiisii ayuu ka soo baxay iyadoo taleefanku guntiga ugu jiro heestuna ay dananyso. Markii uu soo rogmaday oo maraqii iyo canjeeladiiba uu soo qaatay qolkiisiina uusan weli gaarin, ayaa heestii gaartay meel dareenkiisa taabatay:

 

"Hadduu wadajirkii lumay..."

 

Markaasuu isagoon meel laga xigo aqoon madaxa laallaadiyay!

 

"Waqtigiyo dharaaruhu..."

 

Kolkaasuu wada gariiray!

 

"Kala weecad keeneen..."

 

Halkaas markay mareyso ayuu jilay dareenka "beydkaas", ka dibna wixii gacantiisa ku jirayba waa uu sii daayay! Ma war baa ka nool hee markaas!

Erayada heesta waxaa allifay abwaan la yiraahdo Cabdixakiin Cabdullaahi Jibriil, laxankana waxaa saaray Xasan Saleebaan Dhuxul (Laabsaalax). Heestu waa ay dheer tahay, balse tuduca mashaqada dhigay waxa uu leeyahay:

 

“HADDUU WADAJIRKII LUMAY

WAQTIGIYO DHARAARUHU

KALA WEECAD KEENEEN

Wiilkuu calaf kuu dabaday

Wehel kaaga dhigo runa

Weligaa la nooloow

Wadar ubada kala hela”

Waxaanan weli kuu sheegin in ninka qisadaani ku dhacday uu yahay isla anigaan Ibraahin Cumar Seefdheere ah!!! Maxaa rag jab soo arkay! Dawiskaan (link) raac si aad u daawato heesta oo dhammays tiran: https://youtu.be/9x3foPYb0c4

 


W/Q Ibraahin Cumar Seefdheere

Seefdheere120@gmail.com

+252616508040

Comments

Post a Comment

Popular posts from this blog

Halxeraalaha Jacaylka!

-
  Hees abwaan Laabsaalax sameeyay, Nimcaan-Hillaacna ku luuqeeyo ayaa ahayd: "Jacayl waa dareenoo Damac weeye aadmiga Qalbigooda dega oo Aragtida ku dararee!"   Qeexitaankiisa intaas ayaa nooga filan, waana dareen aadanaha Rabbi ku abuuray. Suuraggalnimada in qof ruux kale si aan qalin ama qawl lugu tilmaami karin uu u caashaqi karo la iskuma diiddana, waase lugu kala duwan yahay goorta uu dhab ahaan billaawdo. Qolo waxa ay qabtaa in jacaylku yahay furaha isla jaanqaadka labada qof, waxaase jirta tiro aan yarayn oo ku doodda in jacaylku billaawdo marka labada ruux hooy wada degaan, waxaase qoladaan hor taalla weydiinta ah sidee laba qofood oo aan dun caashaq isku xirayn ay shiikh ugu yeeran karaan? Yeelkadeede, waxaan la isku diiddanayn in jacaylku dhiigga aadanaha dhinac kasta u raaco; wax ku abuuranna yahay. Intii dunidu uunnayd oo dhan jacaylku waa la soo taxnaa. Ummaduhu waxay leeyihiin dumar iyo rag ku caan baxay qisooyin jacayl: Carabtu waa kuwa Qeys iyo Ley...
Read more

Tanina May Sugayday───Sheeko Gaaban

-
Shukaansiga ayuu huud ku qabay. Mar kasta oo uu bannaanka u baxo gabadhii uu arkaba waa uu iskala qabsadaa. Qaar inta fiiriyaan oo candhuuf tufaan ayay jaanta rogaan, kuwana asagoo faraxsan ayay is macasalaameeyaan.      Ma ahan nin uu dooq-wareer ku dhacay oo Qalanjo ayay labo bilood wada socdeen. Waxba ha la yaabin, illeen xariifkaani dooq-wareerkiisu wuxuu gaaray heer inta gabari soo jiidato, oo uu taleefanka ka qorto, isla markii uu ka dhaqaaqaba uu indhaha ku dhufto mid kaloo dhashii nabi Yuusuf ula ekaatee!      Qalanjo waa gabar joog dheer qurux iyo qaayaba loo dhammeystiray, xaflad aroos ayayna si kedis ah isugu barteen. Saaxiibkeen, Qalanjo si aad iyo aad ah ayuu ula dhacay, cilladdeeda ayaase ah in haddii saaxiibkeen uu taleefanka ka qaban waayo ay buuq iyo qaylo bilawdo. waana sababta uusan ilaa hadda xaafaddeeda iyo qoyskeedaba u soo baran. Qalanjo waxay xaafadda iskula nool yihiin Idil oo ay qaraabo yihiin, joog iyo jamaalna ayada taako ka ...
Read more