Dhacdadii 26/1/1991: Ka bixitaankii Jaalle Siyaad ee Muqdisho
26/Janawari/1991 Inta aanan dhacdooyinkii bishaan u gelin, bal aan yara milicsanno sidii xaalku ahaa Diseembar 1990kii. Bartamihii bishii Diseembar 1990kii USC(United Somali Congress) oo ahayd jabhad mucaarad ah, ayaa la wareegtay gacan ku haynta magaalada Jowhar oo Muqdisho 91 kiiloomitir dhanka waqooyi ka xigta iyadoo dagaalyahannada USC ay xabbadda ka soo billaabeen gudaha Itoobiya. Galabtii 30kii Diseembar ayaa dagaalku soo gaaray waqooyiga Muqdisho. Dirirtu waxa ay ahayd mid aad u qaraar oo aan waxba la isula harin. Markii la gaaray 5tii Janawari dagaalku weji qabiil ayuu yeeshay iyadoo labada dhinacba ay habarwacad u tafaxayteen. Inkastoo labadii janan, Maxamed Siyaad Barre iyo Maxamed Faarax Caydiid, ee kala Huggaaminaysay labadii dhinac ee dagaallamaysay aysan marna sheegin in dagaalku mid qabiil yahay, haddana waxaa kaydka ku jira Gabayadii Geelle Ismaaciil iyo hadalladii janan Moorgan. Intaas wixii ka dambeeyay malleeshiyooyin ayaa hardamayey. ...